Մայիսի 13-ին Հայաստանի ամերիկյան համալսարանում կայացավ Միջազգային տնտեսագիտական օլիմպիադայի հանրապետական փուլը: Հանրապետական փուլին մասնակցության իրավունք էր ստացել 36 աշակերտ, որոնք հաղթահարել էին մարտին անցկացված օլիմպիադայի դպրոցական փուլը: Հիշեցնենք, որ օլիմպիադայի դպրոցական փուլին մասնակցել էին 10, 11, և 12-րդ դասարանների մոտ 400 աշակերտներ Երևանի և մարզերի 60 դպրոցներից: Մասնակիցներից 5-ը, հաղթահարելով այս փուլը, կանցնեն միջազգային փուլ՝ սեպտեմբերի սկզբին Բրատիսլավայում մրցելով այլ երկրների մասնակիցների հետ։Օլիմպիադայի հանրապետական փուլը բաղկացած էր 2 մասից՝ գրավոր և բանավոր: Գրավոր մասը, որի բովանդակությունը տրամադրվել է օլիմպիադայի միջազգային գործընկերների կողմից և համապատասխանել է միջազգային ձևաչափին, իր մեջ ներառել է էսսե, բազմակի ընտրություններով հարցեր, հաշվողական հարցեր և գրաֆիկներ: Օլիմպիադայի բանավոր մասը անցկացվել է պրոֆեսիոնալ ժյուրիի մասնակցությամբ Երևանի պետական համալսարանից, Հայ-ռուսական համալսարանից, Հայաստանի պետական տնտեսագիտական համալսարանից, Հայաստանի ամերիկյան համալսարանից, ՀՀ Կենտրոնական բանկից, ՀՀ ֆինանսների նախարարությունից և Հետազոտական ռեսուրսների կովկասյան կենտրոնից: Այս փուլում կարևորվել է աշակերտների տնտեսագիտական գիտելիքները, տրամաբանությունը և ստեղծագործ միտքը:
Տնտեսագիտական օլիմպիադային, որին մասնակցում են 15 երկրների ներկայացուցիչներ, Հայաստանը մասնակցում է առաջին անգամ: Հայաստանում օլիմպիադան իրականացնում է Վարքագծային որոշումների կենտրոնը, գործընկերների՝ Հայաստանի ամերիկյան համալսարանի և ՀՀ Կենտրոնական բանկի հետ համատեղ: Օլիմպիադայի միջազգային համակազմակերպիչներն են Տնտեսագիտական կրթության ինստիտուտը (INEV) և Տնտեսագիտական հիմնարարների նախաձեռնությունը (EFI): Նպատակը դեռահասների մոտ տնտեսագիտության նկատմամբ հետաքրքրություն առաջացնելն ու ֆինանսական գրագիտության մակարդակի բարձրացումն է:
Տնտեսագիտական և ֆինանսական գրագիտությունը չափազանց կարևոր դեր ունի յուրաքանչյուրի կյանքում, և չնայած ոլորտում իրականացվող որոշակի ծրագրերի՝ այնուամենայնիվ խնդիրը դեռ ակտուալ է մնում մեր երկրում: Օլիմպիադան այդ առումով կարևորագույն խնդիր է լուծում ու սա քայլերից մեկն է, որն ուղղված է մեր հասարակության ֆինանսատնտեսական գիտելիքի բարձրացմանը։
ՀՀ կենտրոնական բանկի ֆինանսական կրթման թիմը ողջունում է կրթական ծրագրերին աջակից դառնալու ձեր ցանկությունը: Մենք արժևորում ենք ձեր տաղանդն ու ժամանակը և ուրախ կլինենք տեսնել ձեզ մեր կամավորների շարքում։