Ինչ է կրիպտոարժույթը 

Դա վիրտուալ փող է, որը կարելի է օգտագործել առցանց (օնլայն) հարթակում տարբեր գործարքներ կատարելու համար, օրինակ՝ գնել և վաճառել իրեր:

Ում կողմից է այն ստեղծվում

Ի տարբերություն այլ արժույթների, օրինակ՝ ՀՀ դրամ, ԱՄՆ դոլար, եվրո, այն ստեղծվում է տարբեր անհատների կողմից և մինչև օրս չի վերահսկվում և կարգավորվում պետության կողմից:

Պատկերացրեք՝ ձեր հարևանը մի օր որոշում է ստեղծել նոր արժույթ, որին տալիս է անուն, տեսք, ձեռքբերման ցածր գին և բոլոր հարևաններին սկսում է համոզել, որ դրանով կարելի է գնել տարբեր իրեր, ցանկացած պահի փոխել այլ արժույթի, որ  դրա գինը շուտով բարձրանալու է, ուստի ով դրանում ներդնի իր խնայողությունները՝ կհարստանա: Բայց այս ամենը չի վերահսկվում որևէ մեկի կողմից, ուստիև ներդրած գումարի ապահովության երաշխիքներ ևս չկան: Ինչով է տարբերվում այլ արժույթներից

• Էլեկտրոնային է, շոշափելի չէ:
• Սահմանափակ տեղերում է ընդունվում որպես վճարման միջոց:
• Չափազանց ռիսկային է:
• Չի վերահսկվում և կարգավորվում պետության կողմից:
• Փոխարժեքի տատանումները շատ անկանխատեսելի են և կախված չեն այլ իրավիճակներից:
• Խնդիրների դեպքում չկան գումարի հետստացման երաշխիքներ:

Կրիպտոարժույթով ցանկացած գործարք իրականացվում է բլոկչեին համակարգով, որը կոդավորում է յուրաքանչյուր կրիպտոարժույթ՝ ապահովելով դրա մեկանգամյա օգտագործումը,  այսինքն՝ պաշտպանում է կրկնություններից, կեղծիքներից:

Ինչու է այն այդքան տարածված

• Արագ հարստանալու թվացյալ հնարավորություն է:
• Անանուն է. գործարքներն իրականացվում են կոդավորված հասցեներով, որոնք հնարավոր չէ նույնականացնել որևէ անձի հետ:
• Հեշտ է ձեռք բերել. կարելի է հեշտությամբ գտնել առցանց (օնլայն) արժութային բորսաներում:

Ինչ են ասում մասնագետները

Բազմաթիվ մասնագետների կարծիքով կրիպտոարժույթները ֆինանսական փուչիկ (bubble) են, այսինքն՝ դրանց գները չափազանց ուռճացված են, ուստի մի  օր կարող են «պայթել»։
2008-2009 թթ. ֆինանսական ճգնաժամի պատճառներից մեկն այն էր, որ ֆինանսական ակտիվներն իրենց իրական արժեքից ավելի գերագնահատված էին: Արդյոք վերահսկվում են

Որոշ երկրներ փորձում են վերահսկել, որոշները` արգելում են, որոշները (այդ թվում նաև Հայաստանը) զգուշացնում են իրենց քաղաքացիներին, որ կրիպտոարժույթները մեծ ռիսկեր են պարունակում, հորդորում են զերծ մնալ նման ներդրումներից:

Պատկերացրեք իրավիճակ. ունեք խնայած գումար և, ոգևորվելով ձեր ընկերների հավաստիացումներից, որ իրենք գնել են բիթքոյն և շուտով կհարստանան՝ ոչ մի ջանք չգործադրելով, ներդնում եք ձեր խնայողությունները՝ գնելով  կրիպտոարժույթ: Որոշ ժամանակ անց վերջինիս փոխարժեքն ընկնում է, և դուք ոչ միայն չեք ունենում հավելյալ գումար, այլ նաև կորցնում եք ձեր գումարի մեծ մասը, և ինչ. այս իրավիճակում չկա որևէ կառույց, որը վերահսկի այս գործընթացը և  երաշխավորի ձեր գումարի վերադարձը: 

Ինչ անեմ, եթե ներդրած գումարս կորցրել եմ

Քանի որ կրիպտոարժույթների շուկան չի կարգավորվում, ապա դուք եք միակ պատասխանատուն ձեր գործողությունների և  դրանցից բխող ֆինանսական կորուստների համար:

Ներդնել գումար կրիպտոարժույթներում

1. Չեք սիրում անորոշ իրավիճակներ և պատրաստ չեք  կորցնելու ձեր ներդրած ողջ  գումարը:
2. Ուզում եք ցանկացած պահի ունենալ կանխիկացնելու հնարավորություն:
3. Չունեք ամուր նյարդեր և ազատ ժամանակ ամբողջ օրը փոխարժեքի տատանումներին հետևելու և դիմակայելու համար:

ապա մի ներդրեք կիրպտոարժույթներում, այլ օգտվեք ավելի հուսալի, ապահով և շահութաբեր ֆինանսական  ծառայություններից: Ձեզ կհետաքրքրի նաև

1. Որքան և որտեղ խնայել գումար
2. Ինչպես հեռու մնալ ֆինանսական փորձանքից
3. Ինչպես կատերել անվտանգ և շահավետ ինտեռնետային գնումներ
4. Արագ և անվճար հաշվարկել ձեր աշխատավարձի մաքուր մնացորդը

Նյութից օգտվելու դեպքում հղումը www.abcfinance.am պարտադիր է: