Ֆինանսական նպատակներ

Առաջին գործոնը, որին պետք է ուշադրություն դարձնել ներդրումային որոշումներ կայացնելիս, Ձեր նպատակներն են: Կախված այն բանից, թե ինչի եք փորձում հասնել ներդրում կատարելով, Դուք կարող եք ընտրել առավել հարմար ներդրումային գործիք: Մեծ հարստություն կուտակել ցանկացողները սովորաբար նախընտրում են ներդնել բաժնետոմսերում, որոնք առավել եկամտաբեր են, իսկ պարզապես ապահով ծերություն ունենալու համար շատերը նախընտրում են ներդնել կենսաթոշակային ֆոնդերում կամ գումարը խնայել բանկային ավանդի տեսքով:

Ռիսկի հանդուրժողականություն

Որքա՞ն ռիսկ եք պատրաստ ստանձնել: Ավելի ռիսկային ներդրումները, ինչպիսիք են բաժնետոմսերը, ունեն ավելի բարձր եկամտաբերության ներուժ, բայց նաև ավելի մեծ կորուստների կարող են հանգեցնել: Ավելի ապահով ներդրումները, ինչպիսիք են պարտատոմսերը կամ խնայողական հաշիվները, ունեն ավելի ցածր եկամտաբերություն, բայց նաև ավելի քիչ ռիսկեր են պարունակում: Հետևաբար՝ Ձեր «ռիսկի ախորժակը» ևս որոշիչ պետք է լինի ներդրումային այս կամ այն գործիքն ընտրելիս:

Ժամանակային հորիզոն

Որքա՞ն ժամանակով եք մտադիր ներդրումներ կատարել: Եթե նախատեսել եք երկար ժամանակային հորիզոն, ապա կարող եք ավելի ռիսկային գործիքներ ընտրել, քանի որ երկար ժամանակ կունենաք շուկայի ցանկացած տատանումներից դուրս գալու համար, և միգուցե նման տատանումները երկարաժամկետում նույնիսկ չեն ազդի Ձեր կատարած ներդրումների վրա: Կարճ ժամանակային հորիզոնով ներդրումների դեպքում հարկավոր է ավելի պահպանողական լինել:

Անձնական հանգամանքներ

Անձնական հանգամանքները, ինչպիսիք են տարիքը, ընտանեկան կարգավիճակը, եկամուտը և պարտքի մակարդակը, նույնպես կարող են ազդել  ներդրումային որոշումների վրա:
Օրինակ՝ առհասարակ այն մարդիկ, ովքեր մոտենում են կենսաթոշակային տարիքին կամ նրանք, ովքեր մեծ պարտքեր ունեն, խուսափում են ներդրումներ իրականացնել համեմատաբար ռիսկային գործիքներում։ Այսպիսի մի ոսկե կանոն կա. քանի՞ տարեկան եք, ուրեմն ներդրումների այդքան տոկոսն ուղղե՛ք համեմատաբար ապահով ներդրումներին:  Եթե Դուք 34 տարեկան եք, ուրեմն բոլոր ներդրումների 34%-ը պետք է ուղղեք ապահով գործիքներին, օրինակ՝ պետական պարտատոմսերին, ավանդներին:

Հնարավորության դեպքում ցանկալի է  դիմել ֆինանսական մասնագետի կամ ներդրումային խորհրդատուի օգնությանը, ով, գնահատելով թե՛ Ձեր ֆինանսական վիճակը և թե՛ շուկայական միտումները, կօգնի կայացնելու ներդրումային խելամիտ որոշումներ: