ՆՈՐՈՒԹՅՈՒՆՆԵՐ

2010 թվականի մայիսի 14-ին «Օրրան» բարեգործական հասարակական կազմակերպությունում անց է կացվել տնտեսագիտական-ֆինանսական խաղ-մրցույթի եզրափակիչ փուլը:

Խաղ-մրցույթի նպատակն է նպաստել հանրակրթական դպրոցներում տնտեսագիտություն ուսումնասիրող աշակերտների գիտելիքների և հմտությունների խորացմանը, արագ ու ճկուն մտածելու և կողմնորոշվելու կարողությանը: Արդեն երկրորդ տարին է, ինչ «Brain – Ring» մրցույթի կիսաեզրափակիչ և եզրափակիչ փուլերն անց են կացվել Հայաստանի Հանրապետության կենտրոնական բանկի աջակցությամբ:

«Brain - Ring» մրցույթը «Հայաստանի պատանեկան նվաճումներ» կազմակերպության կրթական ծրագրերի շրջանակներում կազմակերպվող ամենամյա մրցույթների շարք է: Մրցույթի նախնական փուլերը կազմակերպվել են մարզերում՝ 2010 թ. ապրիլ ամսին:

Մրցույթի այդ փուլերին մասնակցել են Հասարակագիտություն առարկայի Տնտեսագիտություն բաժինը ուսումնասիրած շուրջ 500 10-րդ դասարանցի աշակերտներ` ավելի քան 100 դպրոցներից: Մրցույթի նախնական փուլերում յուրաքանչյուր մարզից ընտրվել է մեկական հաղթող թիմ:

Եզրափակիչ փուլի մասնակից թիմերն են եղել`

• Երևանի թիվ 83 դպրոց
• Դիլիջանի ավագ դպրոց (Տավուշի մարզ)
• Աշտարակի թիվ 5 դպրոց (Արագածոտնի մարզ)
• Վարդենիկի կրթահամալիր (Գեղարքունիքի մարզ)
• Նորամարգի դպրոց (Արարատի մարզ)
• Վանաձորի թիվ 8 դպրոց (Լոռու մարզ)
• Էջմիածնի Ներսիսյան վարժարան (Արմավիրի մարզ)
• Գյումրիի թիվ 15 դպրոց (Շիրակի մարզ)
• Արենիի դպրոց (Վայոց Ձորի մարզ)
• Կապանի թիվ 6 դպրոց (Սյունիքի մարզ)
• Աբովյանի թիվ 10 դպրոց (Կոտայքի մարզ)

Մրցույթին մասնակցել են 5 հոգանոց 11 թիմեր: Թիմերին առաջադրվել է տնտեսագիտական խնդիրներ, վարժություններ, ինչպես նաև տեսական հարցեր: Առաջադրանքներին պատասխանելու համար տրվել է 2-10 րոպե ժամանակ, որից հետո թիմերը ժյուրիի դատին են ներկայացրել առաջադրված խնդրի լուծման իրենց տարբերակը: Մրցույթի ընթացքում կարևորվել է ոչ միայն ճիշտ պատասխանը, այլ նաև խնդիրների լուծման ընթացքում արագ և ճկուն կողմնորոշվելու կարողությունը և թիմային աշխատանքը։

Մրցույթի հաղթող թիմերը (1-ին, 2-րդ և 3-րդ հորիզոնականները զբաղեցրածները) պարգևատրվել են ՀՀ կենտրոնական բանկի և «Հայաստանի պատանեկան նվաճումներ» կազմակերպության կողմից սահմանված հատուկ մրցանակներով և պատվոգրերով, իսկ մնացած թիմերին շնորհվել են մասնակցության վկայականներ և նվերներ:

Հաղթող թիմերն են ճանաչվել`

• 1-ին տեղ - Գյումրիի թիվ 15 դպրոց (Շիրակի մարզ)
• 2-րդ տեղ - Էջմիածնի Ներսիսյան վարժարան (Արմավիրի մարզ)
• 3-րդ տեղ - Աբովյանի թիվ 10 դպրոց (Կոտայքի մարզ)

Մրցույթի եզրափակիչ փուլում հաղթող թիմերին ընտրել է ժյուրին, որի կազմում են եղել.

• Մանուկ Մկրտչյանը (ՀՀ կրթության և գիտության փոխնախարար),
• Ամալյա Սարիբեկյանը (ՀՀ կենտրոնական բանկի խորհրդի անդամ),
• Անահիտ Բախշյանը (ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի անդամ),
• Արմինե Հովհաննիսյանը («Հայաստանի պատանեկան նվաճումներ» կազմակերպության գործադիր տնօրեն),
• Իրինա Սեյլանյանը (HSBC բանկի գլխավոր գործադիր տնօրենի տեղակալ):

Մրցույթի կազմակերպիչներն են`

• Հայաստանի Հանրապետության կենտրոնական բանկը
• «Հայաստանի Պատանեկան նվաճումներ» կազմակերպությունը